WAMACHINGA WAPEWA VITAMBULISHO

Posted on: December 29th, 2018

Manispaa ya Moshi imetekeleza agizo la Rais wa Jamuhuri ya Muungano wa Tanzania Dr. John Magufuli la ugawaji wa vitambulisho maalumu kwa ajili ya wafanyabiashara wadogo ili kuweza kufanya biashara zao kwa uhuru pamoja na kutambulika rasmi.

Zoezi la ugawaji wa vitambulisho limezinduliwa rasmi na Mh. Mkuu wa Wilaya ya Moshi Kippi Warioba kwa kugawa vitambulisho kwa wafanyabiashara wadogo (machinga), ambapo  wanafanyabiashara wenye vigezo wapatao  5000 katika Manispaa ya Moshi watanufaika na vitambulishi hivyo.

Akizungumza na wafanyabiashara baada ya uzinduzi wa ugawaji wa vitambulisho hivyo Kippi Warioba, amewataka wafanyabiashara  kutumia

vizuri  vitambulisho walivyopewa ili kuweza kufikia malengo yao pamoja na malengo ya Serikali ya kuanzisha utaratibuo huo.

Hata hivyo ametoa angalizo kwa wafanyabiashara hao kuendelea kufuata taratibu zilizowekwa na manispaa  ikiwemo kuendelea kufanya

biashara zao katika maeneo maalumu yaliyotengwa kwa ajili  ya wafanyabisahara wadogo.

Naye  Meya wa Manispaa ya Moshi Raymond Mboya aliwapongeza wafanyabishara wadogo kwa jinsi ambavyo wamekuwa wakitekeleza maagizo ya Serikali ikiwemo kufanya biashara zao katika maeneo ambayo wamepangiwa na Serikali.

Kaimu Mkurugenzi wa Manispaa ya Moshi Danford Kamenya alisema kuwa Manispaa itahakikisha  kuwa vitambulisho vilvyotolewa na Serikali wanapatiwa  walengwa ili kutimiza malengo ya Rais wa awamu ya tano ya kuwasaidia wanyonge yanafikiwa na siyo vinginevyo.

“Tumeweka utaratibu mzuri kwa kushirikiana na Mamlaka ya Mapato Tanzania(TRA) na ofisi zetu za kata  na tutahakikisha wafanyabiashara wadogo wenye sifa tu ndiyo wakaopata vitambulisho hivi kwani tumebaini kuwa kuna  baadhi ya wafanyabishara wasio na sifa kutaka kufanya ujanja ujanja ili waweze kupata vitambulisho hivi”Alisema..

Kwa upande  wa wafanyabaishara wadogo wameishukuru serikali kwa kuwakumbuka na kuwapatia  vitambulisho hivyo na kusema kuwa vitambulisho hivi vitawaondolea adha walizikuwa wanakumbana  nazo na vile vile vitawasaidia  kufanya biashara zao kwa uhuru  kwani kwa sasa  wanatambuliwa na Serikali.