MHE. MHAGAMA AWATAKA WALE WALIOPEWA MADARAKA YA KUSIMAMIA HAKI ZA WATUMISHI KUWAJIBIKA

Posted on: October 14th, 2022

Waziri wa Nchi,Ofisi ya Rais, Menejimenti ya Utumishi wa Umma na Utawala Bora, Mhe. Jenista Mhagama ametoa wito kwa wale wote waliopewa madaraka ya kushughulikia maslahi na matatizo ya Watumishi wahakikishe wanawajibika katika nafasi zao.

Mhe. Jenista ametoa wito huo  wakati akizungumza na watumishi wa Sekretarieti ya Mkoa wa Kilimanjaro, Halmashauri ya Manispaa ya Moshi na  Watumishi wa Taasisi mbalimabali za umma Mkoa wa Kilimanjaro akiwa kwenye ziara ya kikazi ya mkoani Kilimanjaro.

Aliendea kueleza kuwa ni  wajibu wa  wale wote wote waliopewa dhamana na Serikali kuhakikisha kuwa wanashughulikia maslahi ya watumishi na kero zao ili kuwafanya watumishi wa umma kuwa na furaha na kuwajibika zaidi katika maeneo yao ya kazi.

“Ni ajabu kweli unakuta Mtumishi wa Umma anatoka katika Wilaya anakuja mpaka Wizarani kwa ajili ya matatizo ambayo yanaweza kushughulikiwa na Afisa Utumishi wa Halamshauri husika na Ofisi ya Katibu Tawala wa Mkoa”Alisema