MAFUNZO YA SHERIA YA MANUNUZI KWA MADIWANI

Posted on: May 8th, 2018

Halmashauri ya Manispaa ya Moshi, imetoa

mafunzo ya sheria ya manunuzi ya mwaka 2011 na marekebisho yake ya

mwaka 2016 kwa Madiwani ,hatua ambayo itawawezesha kujua dhana na msingi wa manunuzi ya umma.

Akifungua mafunzo hayo,Katibu Tawala wa Mkoa wa Kilimanjaro Mhandisi

Aisha Amour, alisema yatakuwa chachu kwa Madiwani wa Halmashauri hiyo,

na kuwapa uelewa wa pamoja kati yao na watendaji, ili kusimamia

manunuzi yote yanayofanywa na Halmashauri.

Amour alisema msingi wa manunuzi ya umma, ni kuhakikisha kuwa, kuna kuwepo na

uwazi, uwajibikaji,usawa,thamani ya fedha,uadilifu na ushindani ili

kuleta bei nzuri kwa taasisi ya manunuzi, na hivyo kuwataka madiwani

kutumia mafunzo watakayoyapata kuhakikisha, sheria ya manunuzi na

marekebisho yake inafuatwa na kutekelezwa kikamilifu.

“Ndugu madiwani, Mafunzo haya mnayoyapata, ni muhimu katika

kufanikisha shughuli za manunuzi katika halmashauru yenu,na kupunguza

gharama kupitia taratibu za manunuzi, zenye ufanisi unaofaa kwa

kununua kwa usahihi ili kupata thamani ya fedha”alisema Mhandisi Amor.

Aidha alisema Madiwani wana jukumu kubwa la kusimamia Mapato na

matumizi ya halmashauri,hivyo kutolewa kwa mafunzo hayo, kufungue njia

na mwanga wa kuhakikisha michakato yote ya manunuzi katika Halmashauri

hiyo inazingatia sheria na taratibu  za manunuzi.

Akizungumza Mkurugenzi Mtendaji wa Manispaa Michael Mwandezi, alisema madiwani wakizingatia mada zote zitakazofundishwa, wataweza kuhakikisha Halmashauri hiyo inafanya

manunuzi kwa kuzingatia Sheria,Kanuni na miongozo mbalimbali itolewayo

na Mamlaka ya usimamizi ya manunuzi ya umma.

Wakizungumza baadhi ya madiwani walioshiriki mafunzo hayo,walisema

yatakuwa chachu ya kuwawezesha kusimamia na kutekeleza sheria ya

manunuzi, ikiwa ni pamoja na kusimamia michakato yote ya manunuzi katika

Halmashauri  kwa ufanisi bila upendeleo.